هذا ظنـّي فيك
تفجاتْ ذاتي والرّوحْ،
كاسكْ، يْشيـّبْ مولوعْ
يْمنـّي نفـْسو بطلوعْ.
السـّاعة،العقْبة صْعيبة،
والسـّاقْ رازمْ مفدوعْ.
نفـْسو مشتاقة لجـّوْلة
والتـّيهْ.
والضـّو من بْراجكْ يعـْلى
يعـْلى...
ما بقيتْ طامع برْجوعْ،
ما سخيتْ برْحابكْ
شدّْ عليّ بوابك،
حجـّبْني ، مابين سواركْ
ودفوفكْ،
زيّرني بحبالْ حْروفك،
قـْبلني مْحضري فصـْفوفكْ..
رسم لي حدودْ
ما نتـْعدّى حدودكْ
ما نتـْـنكّرْ الـْجودكْ،
حْسبـْني واحدْ من جنودكْ.
فالـْحة عْشرتكْ،
زينة شْركتكْ.
تحتْ أمركْ
طْليني بشـْهوتْ الشـّوقْ
وْرشـّْني ، بدموعْ رْذاذ،
علـّيني بحْروفي الـْفوقْ،
وعمّرْ بْحوري مدادْ..
وعْلى ريوسْ لشها دْ
دكّيتْ وتادي حْداك.
زْرعني فحوضْ بهاك،
سيّفْـني، مارد معتوقْ،
علـّّمْني نطيرْ طليقْ.
عفاكْ، هرّسْ كبالي
عفاك، درْدرْ خْبالي
فجوفْ التــّلفة،
وغيرْ بْ :خلفة
هنـايا حداكْ،
وغيرْ بْ :خلفة،
يحـْلى لمقامْ
وغيرْ بْ :خلفة
التـّْساله ليـّامْ
وتبْدا جْديدة،
تسلبْ بالنظـّرة.
ايّامْ، تـْقعّدْ وسادْ
الحرف المحمومْ،
تهـْدا لهموم
وكلّْ ما صعابْ يهونْ.
وفعالمْ مفتون
نـْصول صوله،
باهـْية مكْموله
بـْسيفْ الحكمة
تضـْوى الكلمة.
بْلمسة وحدة
نفـْرق شعرة من شعرة،
وبْهذّا وحدة،
نفكّْ خيط بخيطْ.
وبزعْفة وحدة،
نقطـّع شريط لعْقا دْ.
عقْدة حاصلة، فجْلايلْ ليّامْ،
عقْدة شاهقة، فحلقْ لكلام،
وعقْدة لاصْقة، فْطرف
اللـّْسان،
وعقْدة.... بلاش، تلـّْفتْ
اللـّْحانْ...
هذا ظنّي فيك
جيتي فْوقتكْ
وخـّا تْعطـّْلتْ، خطواتك.
جيتي فوقتكْ
وخـّا الطـّريق، سرقاتكْ.
جيتي فوقتكْ
وخـّا لوقاتْ سرْحاتكْ
جيتي فوقتك
ماردّ تكْ، هــدّا
ما خلـْعتكْ رعده..
ونا فرْسامك مهدودْ
فرْضاك نطمعْ
لنواركْ، نطلعْ
محال، نقنعْ
"أفروديتْ" ما تشبع...
حكـّْني، صقلـْني، حتّـى
نلمعْ.
رْجمني ، بطوبْ اللـّهْفة،
كْسيني ، بثوبْ الولــْفة،
لقـّحْني، بنـْسام الـْعطفة..
ذوقـْني، دكـّْني، سفـّْـني،
بْلعني..
غير، لاتـْرجّعني،
خلـّي ظنـّي فيكْ
جْنان زاهرْ بزهورو.
خلـّي ظني فيكْ
جبل عاظمْ بنـْسورو.
خلـّي ظنـّي فيكْ
غوّاصْ يتمتـّعْ فبحورو.
خلـّي تقـْتي فيكْ
تبدّلْ دورتْ ساعاتي.
تهزمْ خوفي من الآتي،
وتعْصرفيّ لذاتي..
خلـّي ماحْلا فيكْ
يتـْخاوا مْع روحي وذاتي،
ويضْربْ قلبكْ، مْع دقـّاتي.
عفاك، لاتْفيّقـْني
مازال نحْلم، بْغيسْ شْتاتي،
مازالْ نمضغْ، قْشورْ سكاتي.
مازال.....
لا.... لاتـْغيّرْ ظنـّكْ بي
غيرْ بلآّ تي...
محمد الراشق:errachek@yahoo.fr
الخميسات في 26 ماي 2005
